ესპანეთში, წყალდიდობის შედეგად დაღუპულთა რაოდენობა 62-მდე გაიზარდა. ინფორმაციას ესპანეთის საგანგებო სიტუაციების სამსახური ავრცელებს.
ესპანეთის პრემიერ-მინისტრმა, პედრო სანჩესმა სატელევიზიო მიმართვა გაავრცელა, რომელშიც განაცხადა, რომ ქვეყნის მთავრობა ვალენსიის რეგიონში წყალდიდობის შედეგად დაზარალებულების დასახმარებლად ყველაფერს გააკეთებს.
“იცოდეთ, ვინც ამ წუთებში საყვარელ ადამიანებს ეძებთ, მთელი ესპანეთი თქვენთან ერთად ტირის“, – განაცხადა პედრო სანჩესმა.
შეგახსენებთ, რომ სამხრეთ-აღმოსავლეთ ესპანეთში, მოსულმა უხვმა ნალექმა, რომელსაც რიგ ადგილებში სეტყვა მოჰყვა, წყალდიდობა გამოიწვია. სტიქიამ გაანადგურა ინფრასტრუქტურა. დანგრეულია სახლები, დაზიანებულია ასობით ავტომობილი.
მეცნიერები ამბობენ, რომ ეს კატასტროფული მოვლენა კლიმატის ცვლილებამ გამოიწვია.
“ეს მომაკვდინებელი წყალდიდობა კიდევ ერთი შეხსენებაა იმისა, თუ რამდენად საშიში გახდა კლიმატის ცვლილება მხოლოდ 1.3°C დათბობის პირობებში” – ამბობს ფრიდერიკ ოტო, ლონდონის იმპერიული კოლეჯის გარემოსდაცვითი პოლიტიკის ცენტრის ხელმძღვანელი.
კვლევებმა აჩვენა, რომ ხმელთაშუა ზღვის რეგიონი – სადაც 510 მილიონზე მეტი ადამიანი ცხოვრობს – საშუალო მაჩვენებელზე 20%-ით სწრაფად თბება. ეს სანაპირო ზონებს წყალდიდობისა და ეროზიის რისკის ქვეშ ტოვებს.
”კლიმატის ცვლილების კონტექსტში, ამ ტიპის ინტენსიური მოვლენები უფრო გაიზრდება. გახდება ხშირი, უფრო ინტენსიური და, შესაბამისად, დესტრუქციული.”
გაეროს გარემოს დაცვის პროგრამა ხმელთაშუა ზღვას “კლიმატის ცვლილების ცხელ წერტილს“ უწოდებს, სადაც დაუცველობა მწვავდება.
- “წყლის ტემპერატურა 2100 წლისთვის 1,8-დან 3,5 °C-მდე მოიმატებს ესპანეთში და აღმოსავლეთ ხმელთაშუა ზღვის ცხელ წერტილებში“, – განმარტავს გაერო. მათივე პროგნოზით, ხმელთაშუა ზღვაში 2080 წლისთვის 20 პროცენტით მეტი ნალექი იქნება.
ექსპერტის თქმით, კლიმატის ცვლილებასა და ამ ბოლო წყალდიდობებს შორის კავშირის სრული მასშტაბი გაურკვეველი რჩება.
