როგორი ამინდია მოსალოდნელი კვირის ბოლომდე საქართველოში – ამის შესახებ გარემოს ეროვნული სააგენტოს ამინდის გრძელვადიანი პროგნოზების განყოფილების უფროსი ხათუნა ქოქოსაძე საუბრობს.
„დასავლეთ საქართველოში კვირის ბოლომდე არამდგრადი ამინდი შენარჩუნდება. სანაპიროზე ხანმოკლე ხასიათის წვიმა იქნება, თუმცა, დამსვენებლებს ძალიან არ შეეშლებათ ხელი. ტემპერატურა 30-32 გრადუსამდე მიაღწევს. ხანმოკლე ხასიათის წვიმები, ძირითადად, საღამოს საათებშია მოსალოდნელი.
აღმოსავლეთ საქართველოში, მთიან და მაღალმთიან რაიონებში იქნება წვიმა. ბარში ნაკლებად, უმეტესად, უნალექო ამინდი იქნება.
რაც შეეხება კოლხეთის დაბლობს, ხანმოკლე ხასიათის წვიმა საღამოს საათებშია მოსალოდნელი. ტემპერატურა 35-37 გრადუსამდე მიაღწევს.
მთიან და მაღალმთიან რაიონებში, საღამოს საათებშია წვიმა მოსალოდნელი და რაც შეეხება ტემპერატურას, 34-35 / 30 გრადუსამდე მოიმატებს.
დედაქალაქში, უმეტესად, უნალექო ამინდია მოსალოდნელი. ჰაერის ტემპერატურა 35-37 გრადუსამდე გათბება.
კახეთში, 17 ივლისს, ღამით, მოსალოდნელია ხანმოკლე წვიმა ელჭექით, შესაძლებელია სეტყვაც.
ძლიერი ქარი მოსალოდნელი არ არის“, – ამბობს სპეციალისტი.
რაც შეეხება ივლისის ბოლომდე დარჩენილ დღეებს, პროგნოზი ასეთია:
„ივლისის მეორე ნახევარში, მაღალი ტემპერატურის ფონზე, ხანმოკლე წვიმები შენარჩუნდება,“ – ამბობს ხათუნა ქოქოსაძე.
